Германскиот тенисер Александар Зверев вчера откри дека уште од својата четврта година боледува од дијабетес тип 1.

Тој во интервју за „Лекип“ открива со какви предизвици се соочувал како дете поради болеста но и како таа одразила на неговата тениска кариера.

– Се срамев, често ме исмејуваа на училиште. Ми ја крадеа опремата, мерачот на шеќер, инсулинот кој потоа го наоѓав искршен во школскиот двор. Кога новинарите ме прашуваа дали  сум дијабетичар, јас негирав. Дури и за време на мечевите се криев во тоалетот додека вбризгував инсулин, а болеста ја криев и од девојките – вели Зверев.

Во минатото, на почетоците од професионалната кариера често му се случувало да му се слоши на теренот.

– Порано за време на долгите мечеви бев малку изгубен, често се прашував каде сум. На тренинзите понекогаш ми се врти во главата. Тогаш морам да застанам и да почекам неколку минути или да одам да јадам нешто и да се вратам за еден час – открива Германецот.