ЗОИ Пекинг: Јада ја заврши трката на 30 км со пласман на 56 место
На Зимските олимписки игри во Пекинг најдобриот македонски спортист во крос-кантри, Ставре Јада ја заврши трката на 30 километри со пласман на 56 место, од вкупно 61 спортист.
Нашиот натпреварувач зад победникот на трката Александер Болшунов од Русија заостана 14:09:1 минути и со време 1:25:41.8 постигна најдобар резултат кој еден македонски спортист во крос кантри го постигнал на Зимска олимпијада.
Трката требаше да биде во должина од 50 км, но поради силниот ветар и ниската температура на воздухот, ФИС-Меѓународната скијачка федерација, одлучи да ја скрати должината на патеката на 30 километри.
Одлуката беше донесена заради безбедноста на спортистите и нивната изложеност на екстремните временски услови кои беа присутни на Олимписката крос-кантри патека во Жангџиаку.
– Горди сме на најдобрите македонски спортисти кои дадоа се од себе на зимските Олимписки игри во Пекинг, НР Кина и им посакуваме, со заедничка квалитетна и напорна работа, на следните зимски Олимписки игри во Милано-Кортина 2026 да постигнат уште подобри резултати – информираат од Македонскиот олимписки комитет (МОК).