Знам дека си ти кога викам алооо…

Сашо Орданоски. / Фото: Слободен печат

Работата на полицијата МОРА да биде под постојан надзор на јавноста и на медиумите, а секако и на опозицијата. Половина од криминалот во Македонија – трговијата и транспортот на дрога, на пример – е НЕВОЗМОЖЕН без учество на корумпирани полицајци од сите „партии“ и „независни кандидатски листи“, во и без униформи. Ама, па, ова со прилепската полициска вибер-група ги надминува и најсмешните вицови за глупоста на полицајците

Фатил цајкан златна рипка. „Ќе ти исполнам три желби, ако ме пуштиш“, му рекла рипката. И ја пуштил.

Вицовите за (не)интелигенцијата на полицајците се еден од најстарите стереотипи во многу култури. Но, прикаската за прилепските џандари, што се обидува на предизборната јавност да ѝ ја „продаде“ ВМРО-ДПМНЕ последниве денови, дека десетици припадници на тамошната полиција, на чело со локалните началници и командири на полициски станици, се организирале во ВИБЕР-група (?!) за, во корист на власта, да вршат притисок врз гласачите со сопирање автомобили по улиците, навистина делува како врвна глупост – од тие што ја објавија! Арно што не му текнало на полковникот Драган Ковачки на партиската прес-конференција да ја облече и офицерската униформа на АРМ, за да делува што поуверливо и поавторитетно…

На локалниве избори ВМРО-ДПМНЕ оствари уверлива победа во Прилеп. Нивниот кандидат Борче Јовчески го „прегази“ СДСМ уште во првиот круг, со освоени 55 отсто од гласовите, со 7-8.000 гласа разлика од противничкиот кандидат Горан Сугарески. Што им треба да го девалвираат тој успех со вакви наивни полициски сказни?!

МВР излезе со податок дека на денот на изборите во Прилеп ниту едно возило не е испратено на вонреден технички преглед и дека, дури, ниедна казна не е „пишана“ за непрописно возење. И тоа е практика што загрижува, а говори за тоа дека полицијата, навистина, има „политички“ резон во делувањето за време на избори, ама во спротивна насока од оваа за којашто сериозно се обвинува: дека е партиски злоупотребена од сегашната власт како механизам за притисок врз гласачите!

Разузнавачко-безбедносниот полусвет собран по изборните штабови на нашите партии доживеа спектакуларен политички пораз токму во ВМРО-ДПМНЕ откако – потврдено и со правосилни судски пресуди – се открија мамутските размери на злоупотребата на безбедносните структури во нивното владеење со државата. Резултатот од тоа и формално го знаеме, бидејќи половина од тој состав е во затвор, другата половина е во бегство во странство – и тоа нашата опозиција е решена НИКОГАШ да не му го заборави на ова раководство на СДСМ! Толку убаво им одеше владеењето, додека не ги раскринкаа…

Затоа, преостанатата „трета половина“ од безбедносното подземје кај вмровците – оние околу поранешниот претседател Иванов, да речеме, не ги ни чепнаа – си ја продолжува политикантската практика да создава политички смутови со произведување „доверливи“ афери и скандали за забава на јавноста. Тие содржини секогаш привлекуваат внимание. Фејсбук е преполн со заговори и шпекулации, а и со „извори“, со најфантастични содржини. Една таква вест со сериозно предупредување за наводна вооружена група која би пукала по избирачки места, ни помалку ни повеќе, на денот на првиот круг на гласање лиферуваше и Американската амбасада во Скопје, за да се покаже дека, наводно, и тие биле изманипулирани со алармантни „доверливи дојави“ од една овдешна политичка партија… Нејсе.

Сепак, да не се разбереме погрешно: работата на полицијата МОРА да биде под постојан надзор на јавноста и на медиумите, а секако и на опозицијата. Половина од криминалот во Македонија – трговијата и транспортот на дрога, на пример – е НЕВОЗМОЖЕН без учество на корумпирани полицајци од сите „партии“ и „независни кандидатски листи“, во и без униформи. Си има уште многу работа и за внатрешната контрола во МВР и за надлежните обвинителства.

Ама, па, ова со прилепската полициска вибер-група – денес секој може да направи група на Вибер, да ги додаде кои сака телефонски броеви и да почне да разменува „доверливи“ пораки – ги надминува и најсмешните вицови за глупоста на полицајците. Додуша, и од другата страна на „драмата“ стојат полицајски умови, па резултатот некако му доаѓа нерешено смешен. А и тажен.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот