Златко Далиќ им одговори на Јапонците: Никогаш не ги потценувајте Хрватите
Хрватската фудбалска репрезентација направи уште еден чекор напред на Светското првенство во Катар откако на пенали во осминафиналната фаза ја елиминираше Јапонија.
Избраниците на селекторот Златко Далиќ кои се светски вицешампиони во четвртфиналето ќе играат против Бразил или Јужна Кореја.
Далиќ изјави дека натпреварот против Јапонците беше тежок, борбен и квалитетен.
– Одигравме добро. Одличен резултат е да се биде меѓу осумте најдобри во светот. Противникот беше ангажиран. Имавме пас контрола, но си направивме проблеми со губењето на топката при кратки додавања, а потоа примивме гол. Јапонија во некои свои најави пред мечот кажаа дека ќе биде лесно со Хрватска. Никогаш не ги потценувајте Хрватите. Можеби сме мали, но ние сме храбри, борбени, верни и да одиме до крај. Упорноста и вербата на момците вроди со плод. Можам само да честитам на момците, до каде стигнавме, што добивме и што направивме – рече Далиќ.
Својот четвртфинален натпревар на СП „коцкестите“ ќе го имаат на 9 декември во Ал Рајан.