Златен медал за Божиноска на карате турнирот во Самобор
Прво место освои каратистката на „Олимпик 2007 Македонија“, Магдалена Божиноска, а со бронзи се закитија Стефан Стојановиќ и Марија Петровска.
Македонските каратисти успеаја да освојат вкупно три медали на 29. издание на традиционалниот меѓународен турнир „Карате Гран При Хрватска“.
Во „кумите“ (јуниори, -76 кг.) третото место го освои Стефан Стојановиќ од карате клубот „Макпетрол“.
Бронзата со него го подели и Хрватот Александар Калабиќ (КК Сокол), прв беше Данило Кравчук од Украина, пред Бетим Малиќи од Косово.
Во „кумите“ (јуниорки, -48 кг.), Марија Петровска исто така од карате клубот „Макпетрол“ ја освои бронзата, третопласирана беше и Србинката Тамара Грчиќ, првопласирана Украинката Полина Марченко пред Кристина Цветанова од Бугарија.
И во „кумите“ (јуниорки, -59кг.), Магдалена Божиноска од карате клубот „Олимпик 2007 Македонија“ освои златен медал , пред Украинката Оксана Базелиук, на третото место се најде уште една украинска натпреварувачка, Елина Сиелиемиениева, како и Хана Дебељак од Словенија.
Комплетните резултати на сите тројца каратисти можете да ги погледнете ТУКА
На овој турнир во Спортската сала „Самобор“ учествуваа околу 2.000 илјади каратисти од 22 држави: Хрватска, Македонија, Азербејџан, Белорусија, Босна и Херцеговина, Бугарија, Црна Гора, Чешка, Данска, Израел, Италија, Косово, Унгарија, Молдавија, Германија, Норвешка, Русија, Словачка, Словенија, Србија, Турција и Украина.