Жолтоградните капуцинери се приспособуваат на животот во ЗОО градината
Новите жители во Зоолошката градина, кои пристигнаа во ноември во Скопје, деновиве се прилагодуваат на надворешната средина. Станува збор за осум жолтоградни капуцинери , кои беа донирани од ЗОО Алветерзоо Мунстер во Германија.
Сите се на возраст од 2 до 8 години и се сместени во живеалиштето кое претходно го користеа мајмуните од видот мангабе. Живеалиштето е направено по светски стандарди согласно условите и препораките на ЕАЗА и зоолошката градина од каде пристигнаа. Овој вид мајмуни потекнуваат од Јужна Америка, најмногу ги има во Источен Бразил и се еден од најзагрозените видови – информираат од Зоолошка градина.
Оттаму објаснуваат дека жолтоградните капуцинери се мајмуни што се многу атрактивни и интересни за посетителиите, па се надеваат дека гостите на скопската ЗОО ќе им се радуваат и ќе се забавуваат со нив.