Претседателот на Русија, Владимир Путин, на 25 март објави дека работната недела која следи ќе биде неработена недела во Москва поради ширењето на коронавирусот, а дека нејзините граѓани треба да останат дома, но се чини дека тие не го послушаа.

Минатиот петок вечерта околу 730.000 автомобили, со околу 10 проценти од населението во Москва, кое вкупно брои 12,7 милиони жители, го напуштија главниот град и центарот на епидемијата и се упатија кон селата, соопшти Министерството за транспорт во Москва.

Егзодусот предизвика стравови за непречено ширење на коронавирусот во земјата и ги налути жителите кои живеат во оддалечените региони, кои досега се чувствуваа релативно заштитени.

Истиот ден, кога бројката на потврдени случаи на инфекцијата надмина 1.000, Русија нареди затворање на државните хотели, одморалиштата и рекреативните објекти исто така ги прекина и сите меѓународни летови.

Но, тоа не спречи повеќе од 17.000 луѓе од Москва и Санкт Петербург да заминат во нивните викендички или во други 80 руски региони, кои се оддалечени на 500 километри од Москва.

Некои локални жители во овие региони ги обвинуваат граѓаните на Москва дека сосебе го донеле коронавирусот.

-Мора да се бориме против паниката. Мора да направиме нешто околу жителите на Москва кои доаѓаат во нивните викендички. Нашата економија зависи од нив, но тие стануваат непријатели. Не треба да биде така– рече извор од локалната власт.

Во регионот Тули, на околу 100 километри од Москва, властите размислуваат да затворат село со 334 викендички, бидејќи едно четиричлено семејство се засолнило таму, откако се испоставило дека се позитивни на коронавирусот по враќање од одмор во странство, објави регионалниот кризен центар.

Семејството веднаш се изолирало во село, но сите мештани морале да бидат тестирани, а улиците да бидат дезинфицирани.