ЖФК Љуботен ги претстави шесте засилувања со кои ќе брка пласман во Европа
Женскиот фудбалски клуб „Љуботен” од Тетово кој беше хипер активен на трансфер пазарот, и официјално ги презентира шесте засилувања со кои првично ќе се обиде да обезбеди опстанок во првата лига, а потоа и ќе се атакува на трофејот во Купот.
Екипата на ЖФК Љуботен од денеска е посилна за Бразилките Ана Беатриз Тарантино – Роналдиња и Таила Фариас, македонската репрезентативка Магдалена Лекоска како и Сања Митреска, Србинката Анѓела Миловановиќ како и Сенада Муратовиќ од БиХ, додека се очекува и пристигнувањето на Меитефанг Танге Хореила Сореле од Камерун.
– Со Хореила Сореле од Камерун имаме договор, но не можеме да и обезедиме виза и затоа не е тука. Има технички проблеми и доколки ги решиме до 15 февруари таа ќе биде претставена, а ако не ќе биде продолжен до јуни договорот со цел да успее да се земе виза – вели Драгољуб Јовановски, потпретседател на ЖФК Љуботен.
Според управата на клубот, идејата е на долг рок да се обезбеди пласман на европски натпревари, а целта е што поголема мотивација кај младите и создавање на силна екипа преку сопствената школа.
– На краток рок се овие засилувања. Клубот не може да опстои со повеќе од пет-шест интернационални и домашни засилувања. Овие засилувања се донесени со цел, посебно атрактивните Бразилки, да се подигне свеста кај девојчињата за женскиот фудбал. Сега е ова овие засилувања се во таков период каде што приморани да го подигнеме нивото на квалитетот да останеме во лигата. Секогаш клубот ќе има 4-5 интернационални засилувања меѓутоа базата секогаш ќе биде од нашата школа – вели Јовановски.
Освен на играчки, екипата се засили и на адмистративен план и за нов спортски директор е именуван Небојша Брежан од Србија.
– Лесно се договоривме, мојата визија е да имаме една систематски квалитетна работа и ако има клуб на здрави нозе, со квалитетни луѓе на терен и во управа. Краткорочна цел е да се обезбеди опстанок во Првата лига и не мислам дека тоа треба да се доведе во прашање со оглед на квалитетот на фудбалерки кои се дојдени и тие што се тука. Повисоките цели се да се постават темели и систем и верувам дека наредната сезона ќе бидеме конкуретни за самиот врв на табелата и излез во Европа, рече Брежан.
Фудбалерките денеска започнаа со подготовките, а планирано е да се одиграат пет пријателски натпревари до 17 февруари, од кои три на 13. и 14. февруари во Србија.