Жена од Мали очекувала седум, родила девет здрави бебиња
Една жена по потекло од Мали, родила девет бебиња во болница во Мароко, пренесува „The Guardian“.
Според ултразвукот направен во Мароко и Мали, на 25-годишната Халима Сисе ѝ било потврдено дека носи седум бебиња.
Бременоста на Сисе ја воодушеви западноафриканската нација и го привлече вниманието на властите. Кога лекарите во март инсистирале дека на жената ѝ е потребна специјалистичка нега, имајќи ја предвид специфичната бременост, лидерот на земјата Бах Ндау наредил жената да биде испратена во Мароко.
Сепак, откако започнала процедурата за царски рез, лекарите доживеале уште поголем шок кога откриле уште две бебиња.
Халима со помош на тимот лекари специјалисти родила пет девојчиња и четири момчиња – сите во добра здравствена состојба.
„Мајката и бебињата засега се чувствуваат добро“, изјави министерката за здравство на Мали, Фанта Сиби, која била информирана за состојбата на младата мајка лично од лекарот кој кој ја придружувал родилката во Мароко.
Лекарите биле загрижени за здравјето на Сисе, како и за шансите за преживување на нејзините бебиња. Медицинските компликации при повеќекратно раѓање честопати се фатални за некои од бебињата.