Железницата ќе добие приоритет во Словенија
Средствата за железничката инфраструктура во Словенија годинава ќе бидат зголемени за 173 милиони евра или за 55 отсто, изјави во Народното собрание Аленка Братушек, која неделава го презеде раководството на Министерството за инфраструктура.
Министерството за инфраструктура пред една недела успешно ги достави сите осум словенечки барања до Европската комисија за средства од фондот „Поврзување на Европа“. Така Словенија лицитира за 86 милиони евра, при што прифатливите трошоци за сите инвестиции изнесуваат 119 милиони, пишува љубљанско Дело.
На овој тендер Министерството за инфраструктура побарало најголема сума на средства за отстранување на тесните грла на пругата меѓу Љубљана и Дивача, поточно 64,34 милиони евра.
Се зголемуваат и средствата за железничка инфраструктура поради завршувањето на проширувањата од претходната финансиска перспектива. „Ако сакаме да зборуваме за зелено, тогаш мора да и се даде приоритет на железницата“, изјави Аленка Братушек.