„Жан Моне“ процес: Фокус е Деловникот на Собранието, но и евроинтеграциските процеси и претстојните избори
Известувачот на Европскиот парламент за земјава, Илхан Ќучук, и европратениците Андреас Шиедер и Марион Валсман во петок и во сабота во Собранието на Република Северна Македонија ќе учествуваат на третата средба во рамки на „Жан Моне” процесот. Во фокусот е Деловникот за работа на Собранието, но и евроинтеграциските процеси на земјата и изборите што треба да се случат на 12 април.
Според информациите на МИА, тројцата европратеници заедно со претседателот на Собранието Талат Џафери и координаторите на пратеничките групи и други пратеници треба да разговараат за спорните прашања помеѓу власта и опозицијата, а тоа се членот 1 односно името на државата во Деловникот, како и начинот на избор на генералниот секретар на Собранието. Се очекува тие да разговараат и за евроинтеграцискиот процес на земјата и претстојните избори во април. Надвор од овие разговори што ќе се одвиваат во Собранието, Ќучук, Шиедер и Валсман ќе имаат средба со лидерите на политичките партии СДСМ, ВМРО-ДПМНЕ, ДУИ, ДПА, Алијанса на Албанците, Алтернатива и Беса, но и со евроамбасадорот Самуел Жбогар и други.
Од ВМРО-ДПМНЕ, пред две недели брифираа дека, дека има и други прашања за кои тие сметаат дека се уште треба да се разговара и предупредуваат дека треба да се има предвид и фактот што Парламентот е пред распуштање, како и дека одржувањето на средбата не значи дека ќе дојде до надминување на сите спорни точки.
„Жан Моне” процесот е алатка на Европскиот парламент во областа на парламентарната медијација и поддршка на демократијата во ЕУ.