Претседателот на Украина, Володимир Зеленски, денеска изјави дека е неопходно да се дејствува заеднички и одлучно на меѓународно ниво за да се блокира потенцијалот за рускиoт терор и рече дека на Украина и се потребни пакети оружје а не зборови.

-Секогаш кога Русија се обидува да ни ги уништи животите, од клучно значење е да одговориме колективно и решително на меѓународно ниво за да го намалиме и блокираме потенцијалот за терор. На Украина и треба сила за да го постигне тоа. Тоа е единствениот начин да се постигне праведен мир и да се стави крај на убиствата на нашиот народ. Провоздушна одбрана, способности со долг дострел, пакети со оружје и санкции против агресори, тоа се потребните дејства, а не само зборови, рече Зеленски на платформата Икс.

Тој потсети дека во текот на ноќта руските сили нападнале неколку украински градови со беспилотни летала и ракети, вклучувајќи ги регионите Одеса, Харков и Киев.

„Во овој момент во Харков се познати повеќе од 20 жртви, меѓу кои и едно дете. Оштетени се станбени згради и инфраструктура. Како резултат на нападот во Одеса, има оштетувања на обични куќи. Едно лице загина. Девет лица се повредени. Итните и спасувачките операции во Запорожје продолжуваат со работа по вчерашниот напад во кој загинаа осум лица, а повеќе од 40 лица беа повредени, меѓу кои и четири деца“, напиша Зеленски, јави Танјуг.