Шефот на Ферари, Матија Биното, во интервјуто за британскиот „Гардијан“ во четвртокот, истакна дека Ферари (поради пандемијата на коронавирусот) нема да прифати понатамошни намалувања на буџетот и рече дека италијанскиот тим „не сака да бара други опции за да ја изрази својата ДНК на трките“.

Извршниот директор на Мекларен верува дека Формула 1 ќе го преживее потенцијалното заминување на Ферари, доколку навистина избере да направи таков потег, доколку не им се допаѓаат одредени промени.

Зек Браун, го осуди ставот на Ферари околу кратењето на буџетот, односно истиот не сака да оди под 145 милиони долари. Според него многу поголем проблем би била загубата на неколку помали тимови..

– Не би сакал Ферари да го напушти спортот, не би сакал никој да излегува од Ф1. Но, мислам дека Формула 1 може да преживее со 18 болиди на патеката и има други производители на мотори кои можат да ги покријат тимовите што во моментот ги снабдуваат – рече Браун.

Доколку буџетскиот лимит е превисок, а поради тоа, оние кои од своите џебови инвестираат во Формула 1 бидат принудени да заминат, тој не мисли дека Ф1 би преживеал со 14 болиди.

– 16 се на граница, со 18 може. Мислам дека Формула 1 би преживеала без нив (Ферари), но посакувам да останат. Мислам дека спортот е многу подобар со нив отколку без нив – додаде Браун.