„Зебри“ на тронот: Кил е новиот европски шампион!
Вечерва во големото финале на Фајнал-фор турнирот во Лигата на шампионите за сезоната 2019/2020 екипата на Кил триумфираше со 33:28 (19:16) против Барселона.
Иако пред мечот Барса можеби ја имаше фаворитската улога, на крајот популарните „зебри“ повторно се искачија на тронот за првпат после осум години.
Кил силно стартуваше од првата минута, на играчите на Барселона им дозволија да поведат само еднаш во целото прво полувреме и тоа при резултат 3:2. Имаа константно два гола предност и потоа после 15 минути игра имаа големи „плус четири“ откако водеа со 13:9.
RESULT: @thw_handball are the @VELUX #ehffinal4 2020 CHAMPIONS! They beat @FCBhandbol 33:28! ?#ehfcl pic.twitter.com/FtsA7kVwdh
— EHF Champions League (@ehfcl) December 29, 2020
Барса додаде „гас“ и со серија од 3:0 дојде на еден погодок негатива, а пред паузата успеа и да израмни на 15:15. Но, германската екипа одигра одлично во последните три минути и со серија од 4:1 доаѓа до 19:16.
Потоа, во првите 10 минути од вториот дел Кил повторно имаше „плус четири“. Ја одржуваше таа позитива која порасна и на „плус пет“ на 15 минути до крајот на средбата, но имаше уште многу да се игра, и против тим каков што е Барселона, нема никогаш опуштање.
Бундеслигашките гиганти ја задржаа концентрацијата, не дозволија нова неизвесност и дојдоа до посакуваниот триумф. За Германците ова е вкупно четврта титула во својата историја, а Каталонците остануваат на девет трофеи во елитното натпреварување.
На денешниот дуел во „Ланксес Арената“ во Келн во победничките редови доминираа Никлас Екберг со осум голови и Сандер Сагосен кој запиша седум.
На спротивната страна 10 погодоци забележа Алеиш Абељо Гомез, а по четири имаа Аитор Бенгоечеа Арињо и Дика Мем. Претходно во борбата за третото место славеше составот на ПСЖ кој беше подобар од Веспрем со 31:26 (14:11).