Здружението за еднакви права и можности „Жените во економијата” од Штип ќе прави анализа колку жени биле жртви на мобинг во приватниот и јавниот сектор.

Координаторката на проектот, Лилјана Варадиновска вели дека целта им е преку позитивни примери кои добиле судска разрешница да ги охрабрат жртвите. Засега нема прецизна статистика колку жени биле жртви на мобинг, бидејќи не само што тешко се докажува, туку и поради притисоците ретко, кој се осмелува да го пријави.

– Првиот аспект е утврдување на бројот на жени од источниот регион, кои биле блиску до мобинг или биле жртви на мобинг. Проектот е со наслов „Биди храбра говори гласно”. Вториот аспект е односот на институциите кон мобингот и позитивните пресуди за жртвите од страна на судската власт, паралелно со ова ќе дебатираме и со сите инволвирани институции и граѓани- вели Варадиновска.

Вишна Шорова-Ангеловска забележа дека здружението за еднакви права и можности „Жени во економијата” и преку теренски анкети ќе ги мотивира жените да пријават вознемирување на работно место. Таа истакна дека во овој случај нема да издаваат брошури, туку преку теренски активности и дебати со жените ќе ги мотивираат да пријават мобинг.

Според анализите, мобинг има и во јавниот и приватниот сектор. Во јавниот, мобингот најчесто се врши поради партиска припадност. Во приватниот, според Синдикатите, бројот на жртви на мобинг е поголем, но и потешко се докажува. До невладините организации во првата половина од годината стигнале десетина пријави, но на судска разврска се одлучила само една од странките.

Проектот е поддржан од Фондацијата отворено општество, а здружението ќе истражува и работи на територија на источниот регион.