Здрава навика поради која имате трипати поголем ризик од инфаркт
Многумина, освен поради убавината на телото и добрата форма, одат во теретана за да се „издуваат“ од сите фрустрации што се насобрале во текот на денот. Новите истражувања тврдат дека тоа може да биде многу опасно.
Студијата е спроведена на 12.500 пациенти што преживеале срцев удар и сите детално опишале што правеле еден час пред инфаркт. За споредба, тие опишале што правеле и како се чувствувале и претходниот ден. Се покажало дека повеќето еден час пред срцевиот удар или биле лути или вежбале.
Откако ги анализирале податоците, истражувачите заклучиле дека гневот, односно лутината и вежбањето двојно го зголемуваат ризикот од срцев удар. Но, уште полоша е ситуацијата ако вежбате налутени, тогаш ризикот се зголемува трипати, пренесува „Менс хелт“.
Доктор Ендрју Смит вели дека ова е затоа што, поради лутина и вежбање, крвните садови се стеснуваат и затоа не можат да го снабдат срцето со доволно крв, во која на срцето му е неопходен кислород, па доаѓа до срцев удар.
Иако резултатите од студијата се вознемирувачки, треба да се напомене дека тие особено се однесуваат на ризичните групи.
– Ако сте млади и немате проблеми со срцето, можете да вежбате додека сте лути. Кај младите, позитивната страна на вежбањето е многу поголема од негативната страна – рекол доктор Смит.
