Речиси сосема обични тенки палачинки – еднакво брзи и лесни за правење, како класичните на кои сите сме навикнати.

Повеќето од нас имаат свој рецепт за палачинки. Стефанија Несторовска, која стои зад инстаграм-профилот и блогот snestorovska.com денеска ни носи своја верзија на палачинки – направени од 3 состојки.

Состојки:

– 90 г (1 филџан) овесни снегулки
– 240 мл (1 филџан) бадемово млеко, или млеко по желба
– 2 јајца
** Јас во смесата не додадов никаков засладувач, но вие можете слободно да си додадете. Мед, јаворов сируп, кокосов шеќер и слично… Јас сакам да додавам врз палачинките така што вака ми беше совршено.

Подготовка:

Се додаваат сите состојки во блендер и се блендира сè додека не се добие кремаста смеса. Смесата треба да биде доста потечна од американски палачинки и лесно да се разлева низ тавата за печење. Ако има потреба, додајте повеќе млеко.

Се загрева тавче за палачинки и се додава малку кокосово масло. Со црпалка се додава малку од смесата и се разлева низ тавата, се остава да се пржи две-три минути односно додека не се појават меурчиња, се превртува и се пржи дополнителни 2-3 минути.

Се продолжува постапката со останатата смеса.

Додадете преливи по желба, завиткајте како палачинка и уживајте во вкусот.