Заврши акцијата на северот на Косово, специјалната единица си замина заедно со двајцата уапсени (ФОТО)
Во полициската акција во српските општини на Косово, која започна околу шест часот утринава, уапсени се две лица. Станува збор за синот на Жељко Бојиќ, оперативен шеф на Косовската полиција и Радо Басара, двајцата уапсени кои се поврзани со убиството на политичарот Оливер Ивановиќ, јавува Експрес.
Специјаланата единица веќе заминала за Приштина со двајцата уапсени, кои се интервјуираат во објектот на Специјалното обвинителство.
Специјалниот обвинител Сул Хоџа кој го истражува случајот, за Експрес изјавил дека ова акција е реализирана врз основа на наредба од Специјалното обивнителство со одлука на Основниот суд во Приштина, односно Секторот за тешки злосторства.
– Можам да ја потврдам акцијата. Во моментов уапсивме две лица а уште едно лице се бара. Нивното апсење е во врска со прикривање на докази во врска со случајот на убиството на српскиот политичар Оливер Ивановиќ. Но, постојат сомнежи и за учество во организиран криминал – изјавил Хоџа за Експрес.
Во ова акција, се верува дека учествувале 100 полицајци на специјалната единица на Косово со 25 оклопни возила.
Инаку Оливер Ивановиќ, поранешен министер и пратеник во косовското Собрание беше претседател на СДП, а беше убиен на 16 јануари 2018 година.