Завршниот турнир во СЕХА лигата ќе се одржи во Задар
Денеска СЕХА објави дека последните натпревари од регионалното натпреварување ќе се одиграат на 3 и 5 септември 2021 година во Задар, Хрватска.
На 3 септември се закажани полуфиналните натпревари, а два дена подоцна дуелот за третото место и големото финале.
Втора година по ред повторно Ф4 турнирот ќе се одржи во Задар кој беше домаќин и во сезоната 2019/20 кога титулата ја освои Веспрем со победата над Вардар.
Во четвртфиналето Вардар 1961 за противник го има ППД Загреб, додека Е. Пелистер ќе се соочи со Мешков Брест.
„Црвено-црните“ ќе го пречекаат хрватскиот претставник во СЦ „Јане Сандански“ – Скопје во првиот меч на 26 август, а реваншот е во Загреб на 31 август.
На останатите две пресметки, Татран Прешов за ривал го има Мотор Запорожје, а Нексе ќе се обиде да направи изненадување против Веспрем на македонскиот репрезентативец Дејан Манасков.
