Завршија протестите во Албанија, Баша: Тие што ја водат земјата не се свесни за тоа што допрва ќе дојде
Претседателот на најголемата опозициска партија на Албанија, Љуљзим Баша, на денешните протести во својот говор кој го одржа во градот Елбасан, пред насобраните граѓани кои протестираат против власта упати силни критики кон актуелниот албански премиер, Еди Рама.
„Протестите немаат никаква поврзаност со индивидот Еди Рама, тие се поврзани со феноменот Еди Рама, којшто ги држи под заложништво Албанија и албанските институции, којшто е проблем за Албанија и за иднината на албанците, и ќе биде проблем за регионот и за иднината на регионот.“ изјави Баша.
Баша нагласи дека граѓанската непослушност не ни почнала и дека блокирањето на улиците само за два часа не е граѓанска непослушност.
„Граѓанска непослушност ќе биде кога улиците ќе бидат затворени 24 часа и 7 дена во неделата. Тие што ја водат земјата не се свесни за тоа што допрва ќе дојде, тие сеуште ништо немаат видено.“ нагласи Љуљзим Баша.
Протестите беа помасовни од претходните протести и се одржаа во повеќе градови во Албанија, опозициската партија бара отказ од сегашната влада и предвремени избори без Еди Рама и неговата екипа и најави уште помасовни протести повторно на 11 мај во Тирана.