Заврши снимањето на филмот „Живи и здрави“
Агенцијата за филм присуствуваше на последните снимачки денови на црногорскиот филм „Живи и здрави“ по сценарио и во режија на Иван Мариновиќ, и во копродукција на македонскиот „Круг филм“.
„Живи и здрави“ е втор филм на Мариновиќ. Актерската екипа ја сочинуваат звучни имиња, како Никола Ристановски, Тијана Лазовиќ, Горан Славиќ, Момчило Пиќуриќ, Горан Богдан, Сњежана Шишков-Синовчиќ, Дејан Ѓоновиќ, Мирјана Јоковиќ и Драгана Дабовиќ. Автор на музиката е македонскиот композитор Тони Китановски.
Приказната е за идна невеста што одбива да се мажи, па безмилосниот патријарх на семејството на младоженецот ѝ предлага да ја одглуми свадбата и следниот ден да оди каде сака. Невестата се согласува, иако младоженецот се надева дека таа ќе остане. Традиционалната свадба вбројува апсурдни настани, потопени во алкохол, пукотници и динамит, што ќе ги изнесе на виделина најлошите карактеристики на ликовите.
Проектот е поддржан од Филмскиот центар на Црна Гора, Филмскиот центар Србија, Чешкиот филмски фонд, Хрватскиот аудиовизуелен центар (HAVC), Агенцијата за филм на С Македонија, Словенечкиот филмски центар, МЕДИА на „Креативна Европа“, „Си синема нетворк“, „Еуримаж“, Порто Нови, Туристичката организација на Херцег Нови и општината Херцег Нови. Снимањето почна минатиот месец, а заврши на 23 јуни. Филмот се снимаше на повеќе локации во Црна Гора.
(Текстот е објавен во ТВ и Филмски печат на 24 јуни 2022 во весникот „Слободен печат“)