Заврши расчистувањето на остатоците од пожарот во „Глобал”
Екипи на ЈПКД „Комуналец” денеска завршија со расчистувањето на остатоците од големиот пожар во Трговскиот центар „Глобал” во Струмица. Исфрлени се околу 370 тони најразличен отпад, најмногу од делот на Градскиот пазар каде изгореа голем број тезги и продавници.
Според Бранко Ѓоргиев од струмички „Комуналец”, до крајот на денот се очекува да биде отстранет и еден помал дел на отпад од третиот кат, каде имаше најмалку штета.
– Со специјализарано возило и рачно утре продолжуваме со миење и дезинфекција на опожарениот простор, а потоа со санирање и изградба на деловите кои беа зафатени од пожарот, како и со поправка на електричната инсталација, истакна Ѓоргиев.
Инаку, во пожарот, кој избувна ноќта на 2-ри овој месец, опожарена е една третина од Градскиот пазар, повеќе продавници на приземјето и првиот кат, дел од вториот, а урнат е и дел од покривот на комплексот „Глобал”.