Заврши првото издание на фестивалот „Преку езерото“ во Стар Дојран

Со проекции на три краткометражни филмови од натпреварувачката програма и француската комедија „Суперхерои“ во отворениот амфитеатар во Стар Дојран, синоќа (7 август), официјално беше затворено првото издание на Меѓународниот филмски фестивал на медитерански и европски филм „Преку езерото“.

Членовите на меѓународното жири за краткометражни филмови – Ева Камчевска, сценаристка, Гоце Кралевски, продуцент, и Василис Мазоменос, режисер, во улога на претседател на жирито, ги доделија наградите.

Жирито додели посебно признание на тројца актери од хрватскиот филм „Марко“, на Мате Гулин, Снежана Синовчиќ и Феџа Стојановиќ.

Наградата за најдобро сценарио ја доби грчкиот филм „Поглед од балконот“, напишано од Арис Капланидис и Елиас Румелиотис. Овој оригинален анимиран филм зборува за обични луѓе од соседство во Атина, прикажувајќи ги реалистично, а не како карикатури.

За брилијантната и модерна режија на многу тешка тема, без форсирање сентиментализам, жирито едногласно реши да ја додели наградата за најдобра режија и најдобар филм на „Што, всушност, ние не знаеме за Миријам“ на Морад Мостафа.

„Преку езерото“ е прв филмски фестивал од овој формат во Македонија и ќе се одржува традиционално секоја година во првиот дел од месец август. Фестивалот е потпомогнат од Општина Дојран, а е во реализација на продукцијата „Синемон“.

Видео на денот