Засилени безбедносни мерки во центарот на Атина – Слободен печат
ВестиРегион

Засилени безбедносни мерки во центарот на Атина

Причината за тоа е одржувањето на годишнината од студентскиот бунт против хунтата

Над 5000 полицајци, дронови и хеликоптер денеска ќе се грижат за безбедност во Атина, во обид да се спречат инциденти за време на одбележување на годишнината од студентскиот бунт и падот на хунтата.

Како и секоја година ќе се одржи протестен марш од Политехничкиот факултет, местото од каде што почна бунтот во 1973, до Амбасадата на САД во Атина.

Под посебно полициско обезбедување ќе бидат владините објекти, министерствата, амбасадите и слично, а според медиумите во Грција, за безбедноста на американската амбасада ќе биде поставена блокада од 17 полициски автобуси.

Паралелно, ќе бидат затворени и три метро станици што се наоѓаат во деловите низ кои ќе поминат демонстрантите.

За првпат на улиците ќе излезе и новоформираната полициска единица „Драси”, односно полицајци на мотори кои ќе се движат низ центарот на Атина, а во состојба на готовност ќе бидат и цистерните со вода за растерување демонстранти.

Грчката полиција веќе од четвртокот започна да спроведува дел од мерките, во соработката со општината отстранети се сите канти за отпадоци во центарот на Атина.

Во фокусот на грчката полиција веќе неколку денови е атинската населба Ексархија, која важи за собиралиште на анархисти и населба во која секоја година, по завршувањето на традиционалниот марш се случуваат сериозни инциденти меѓу маскирани лица и полицајци. Особен акцент, полицијата ќе стави на спречување на нападите на маскираните лица со предмети и молотови коктели од балконите на зградите, а според АНА-МПА, за да се избегне реприза на ваквите инцидентите од изминатите години, задолжени ќе бидат дроновите на грчката полиција кои ќе ја следат ситуацијата.

Медиумите во Грција коментираат дека оваа година „Атина мириса на барут” и дека постојат страв од сериозни инциденти поради последните случувања, меѓу кои интервенциите на полицијата во објекти под опсада, влезот во Економскиот факултет во Атина и празнење на просториите што беа под опсада, но и по поради последниот судир на полицијата со група маскирани лица во дворот на Економскиот факултет.

Градоначалникот на Атина, Костас Бакојанис, преку неговиот официјален Фејсбук профил повика сите учесници во протестот да покажат почит кон градот, да ја испратат вистинската порака, а не „повторно да се фрли во сенка суштината која што е борбата на младината за демократија”.

Протесниот марш од Политехничкиот факултет до Амбасадата на САД во Атина е закажан за попладневните часови.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close