Запрена изградбата на три модуларни амбуланти во Скопје

Изградбата на три нови модуларни амбуланти, кои треба да ги заменат дотраените бараки во Скопје, е запрена, објави телевизија Сител, која не добила конкретен одговор од надлежните околу причините за стопирањето на градбата.

“Замената на времените објекти од амбулантно-поликлиничка дејност, се одвиваат согласно планираните активности. По согледувањето од стручниот надзор, а во врска активностите на терен се работи на дообезбедување на инфраструктурни приклучоци и запазување на временски рамки поврзани со градежниот процес. Притоа, сакаме да напоменеме дека рокот за реализација изнесува 60 дена, односно два месеца”, велат од Министерството за здравство.

Работата на изградбата на амбулантите била запрена во Ѓорче Петров, Ново Лисиче и Бутел, според Сител.

Министерството за здравство подоцна соопшти дека „до овој момент не добило никакво известување од надзорот на објектите, ниту од изведувачот, дека се прекинати какви било активности, туку дека активностите се одвиваат според планираната динамика“.