ЗАПОЧНА ТУРСКАТА ОФАНЗИВА? Авиони пукаа врз објекти на Курдите во северна Сирија
Авиони на турските сили ноќеска извршија воздушен напад врз објекти на курдските вооружени групи во северна Сирија, јави телевизијата Мајдин.
Како што е објавено, целта била командниот центар на курдската група што ја поддржува антивладината организација Сириски демократски сили во градот Ал Малики.
Засега нема извештаи за жртви или материјални штети.
Турските авиони во текот на денот извршиле интензивно надгледување на пограничната област.
Дополнително, турското Министерство за одбрана на Твитер соопшти дека Турција е подготвена за евентуална воена операција.
Воспоставување „безбедносна зона” е основно за мир и стабилност во регионот како и за тоа Сиријците да живеат во мир, додава Министерството.
Во меѓувреме, САД соопштија дека нема да почнат со целосно повлекување од Сирија. Според неименуван претставник на администрацијата во Вашингтон, само околу 50 војници се преместени во границите на државата за да се избегнат штети.
– Тоа не претставува повлекување од Сирија, нагласи тој во изјава за американски медиуми. Тој додал дека Пентагон и објаснил на турската страна дека целосна инвазија би била „лоша идеја” и Анкара ќе биде одговорна за евентуална хуманитарна криза или повторни напади од ИД. Претставникот додава дека одлуката на претседтаелот Доналд Трамп не значи и зелено светло за убивање Курди – јави ДПА.