Во Албанија, Социјалистичката партија денеска информираше дека одлучила да иницира постапка за разрешување на претседателот Илир Мета.

Ова е прв пат во Албанија, Собранието да преземе таков екстремен чекор, по одлуката на шефот на државата да го откаже датумот за локалните избори закажани за 30 јуни, јавува Гласот на Америка на Албански јазик.

По завршувањето на состанокот на претседателството на Социјалистичката партија, министерката за Односи со Собранието, Елиса Спиропали изјави дека со својата одлука претседателот сторил “брутален акт кон Републиката”.

– Ние, како претседателство, сметаме дека Мета го изгубил правото да остане во таа позиција – вели Спиропали.

Ваков став најави еден ден порано и премиерот Еди Рама, според кој одлуката на шефот на државата е „чин што е политичко самоубиство, правно е ништовен, не постои и морално е срамен”, додавајќи дека „Илир Мета ја потпишал својата судбина како претседател кој го загубил правото да остане во оваа канцеларија”

Спиропали објасни дека процедурите за разрешување на претседателот на државата ќе почнат веднаш на собраниската седница во четврток.