Запалени автомобилите на штипското семејство Тушеви блиско до СДСМ
Изутринава запалени се автомобилите на Никола и Мите Тушеви. Инцидентот се случил во населба „Сењак 3“ на улица „Борис Крајгер“, обајви порталот Исток Прес.
Возилата биле опожарени така што пироманите прво ги скршиле стаклата од возилата, а потоа во нив фрлиле молотови коктели. Автомобилите на Никола и Мите не биле паркирани едно до друго туку на спротивни страни, поради што пироманите морале да употребат два молотови коктели. Во инцидентот било опожарено и трето возило кое се наоѓало веднаш до возилото на Мите Тушев.
Никола Тушев до неодамна беше претседател на Општинската организација на СДСМ, неговата сестра Маринела е поранешна пратеничка, а денес работи во кабинетот на министерката за одбрана Радмила Шекеринска, неговиот зет Бојан Маричиќ е дел од кабинетот на премиерот Заев, а Мите Тушев е долгогодишен активист на СДСМ во Штип.