Западните медиуми за Ратко Младиќ: Со пресудата за „босанскиот касап“ се затвора едно од најкрвавите поглавја во историјата
Пресудата на Ратко Младиќ за геноцид и воени злосторства затвора едно од најкрвавите поглавја во модерната европска историја, иако неговото наследство сè уште ги дели БиХ и регионот, а сенката на неговите злосторства се шири надвор од Балканот инспирирајќи ги екстремните десничари во светот.
Скоро три децении по избувнувањето на војната на Балканот, каде беа забележани некои од најшокантните злосторства во Европа од крајот на Втората светска војна, Меѓународниот трибунал во Хаг во вторникот, 8 јуни, му ја потврди пресудата на главниот командант на крвопролевањето, пишува Њујорк Тајмс.
Според американскиот весник, со потврдата на пресудата на Меѓународниот кривичен трибунал за поранешна Југославија, завршува едно од најтемните поглавја на модерната европска историја и се става крај на правната борба што се води од 1995 година, кога Младиќ беше првпат обвинет.
Најновата пресуда за случајот Младиќ доаѓа во време на зголемена жестокост во српските националистички кругови кои сакаат да ја препишат историјата на конфликтот, негирајќи ги наводите за воени злосторства и забранувајќи ја епизодата да се споменува во училишните книги, посочува Њујорк Тајмс, додавајќи дека се слават осудени воени злосторници какохерои и добиваат истакнати позиции.
Кога Трибуналот беше основан во 1993 година, додека борбите сè уште траеја, целта беше да одговараат сторителите на најтешките злосторства и да се воспостави солиден историски запис за настаните со надеж дека тоа може да биде основа за помирување, укажува Њујорк Тајмс додавајќи дека е рано да се каже каква улога ќе играат судските записи во заздравувањето на сè уште поделениот регион.
За луѓето што го следеа судскиот случај на Младиќ, останува важно прашање како историјата ќе суди за неговите постапки – дали ќе остане запаметен како злосторник на крвав геноцид или ќе се опстојат обидите да се претстави како патриот и херој, истакнува Њујорк Тајмс.
Младиќ беше военото лице на брутална тројка која на политичката страна ја предводеа поранешниот југословенски претседател Слободан Милошевиќ и поранешниот водач на босанските Срби, Радован Караџиќ, објави агенцијата Франс прес.
Хашкиот трибунал утврди дека Младиќ играл водечка улога во некои од најстрашните злосторства на европско тло од нацистичкиот холокауст за време на Втората светска војна, пишува Ројтерс.
За геноцидот во Сребреница, судиите утврдија дека Младиќ играл апсолутно клучна улога затоа што тој ги контролирал воените и полициските единици вклучени во апсењето на затворениците и масакрот.
Со исходот од судењето на Младиќ, посочува Ројтерс, се заокружуваат 25 години судења на ад хок Меѓународниот кривичен трибунал за поранешна Југославија, кој осуди 90 лица.
Ратко Младиќ спроведе политички план, осмислен на врвот, за исчезнување на делови од муслиманското население во БиХ, посочува Би-Би-Си.
Етничкото чистење започна со прогонство – пропагандата ги сврте соседите едни против други – и заврши за илјадници луѓе кога луѓето на Ратко Младиќ ја окупираа базата на Обединетите нации во Поточари, која беше назначена како безбедна зона.
Додека Ратко Младиќ беше во бегство 16 години, многумина стравуваа дека нема да го видат судскиот процес против него, соопшти британскиот јавен сервис, истакнувајќи дека обвинителите сега се надеваат дека судењето за Младиќ ќе испрати порака до регионот и пошироко дека одложувањето на правдата не значи негирање на правдата.
Осудите за геноцид на Младиќ и Радован Караџиќ, главните личности кои командуваа и извршуваа етничко чистење и масовни убиства во граѓанската војна во Босна, го затвораат најкрвавото поглавје во европската историја од 1945 година, пишува Тајмс.
Сепак, според лондонскиот весник, многу Срби сè уште го сметаат Младиќ за воен херој. Србија одбива да признае дека геноцидот се случил во Сребреница, додека масовните убиства редовно се негираат.
Минатата недела, Милорад Додик, за кој весникот вели дека е лидер на Република Српска, рече дека геноцидот во Сребреница „не се случил“ додека тој беше покрај српскиот претседател Александар Вучиќ.
Лондонскиот весник посочува дека Додик ги намалил масовните убиства споредувајќи ги со хрватското истребување на Србите во Втората светска војна.
Пресудата на Младиќ значи дека 79-годишниот поранешен генерал, кој ја тероризирал Босна за време на војната, ќе го помине остатокот од својот живот во затвор, според Асошиејтед Прес, додавајќи дека тој е последната значајна фигура во конфликтот што заврши пред повеќе од четвртина век и се соочил со правдата.
Младиќ ќе му се придружи на поранешниот претседател на босанските Срби, Радован Караџиќ, на издржувањето доживотна казна затвор поради организирање етничко крвопролевање во босанската војна, во која беа убиени повеќе од 100.000 луѓе, а милиони останаа без покрив над главата.
Токсичното наследство на Младиќ, кој беше познат како „босанскиот касап“, сè уште ја дели БиХ, но неговата темна сенка се прошири подалеку од Балканот, посочува АП.
За Србите во БиХ, тој е воен херој кој се борел за да го заштити својот народ, додека за Бошњаците, претежно муслимани, тој е злосторник одговорен за нивните воени страдања и загуби.
Сепак, посочува АП, сенките на Младиќ и Караџиќ се шират далеку над границите од Балканот зошто се почитувани меѓу приврзаниците на крајната десница поради своите крвави воени кампањи. Се верува дека Австралијанецот кој уби десетина муслимански верници во Крастчрч на Нов Зеланд бил инспириран од воените водачи на босанските Срби, како и Анреас Брејвик, норвешиот бел расист кој уби 77 лица во Норвешка во 2011 година.
Извор: Бета
ВИДЕО | Андоновиќ: По 533 дена судење и десет години зад решетки, конечна пресуда на Младиќ
ВИДЕО | Андоновиќ: По 533 дена судење и десет години зад решетки, конечна пресуда на Младиќ