ФОТО | Заминување во легендите: Кој беше Чарли Вотс, мирниот тапанар од „Ролинг Стоунс“
Британскиот тапанар Чарли Вотс кој умре на возраст од 80 години, ќе остане запаметен како мирен член на контроверзниот, култен рок-бенд „Ролинг Стоунс“, кој држеше ритам на легендарниот рок состав во својот постојан стил.
Вотсовиот ладен израз на лицето и метрономските ритми беа составен дел од класичните настапи на бендот, урамнотежувајќи ја сценската енергија и харизма на пејачот Мик Џегер и немирниот дух на гитаристите Кит Ричардс и Рони Вуд.
Додека другите членови на групата беа познати по распадот на бракови, зависности, апсења и бесни испади, Вотс живееше мирен живот со сопругата Ширли Шепард повеќе од 50 години на сточарска фарма во зафрлениот Девон.
„Во пет децении хаос, тапанарот Чари Вотс беше смирување во средината на бурата „Ролинг Стоунс“, и на сцената и надвор од неа“- објави „Мирор„ во 2012 година.
Во осумдесеттите тој се лекуваше од алкохолизам и зависност од хероин, но кажа дека успешно се ослободил од тие пороци.
– Тоа беше краткотрајно. Едноставно престанав, воопшто не ми одговараше – изјавил за еден таблоид.
Демолирањето хотелски соби и спиењето со обожавателки, никогаш не го привлекувале Вотс.
– Никогаш не го исполнив стереотипот на рок ѕвезда. Со Бил Вајман решивме во 70-те да пуштиме бради и тој обид нè исцрпе- изјави за списанието „Ролинг Стоун“ во 1994 година.
Љубов кон џезот од мали нозе
Чарлс Роберт Вотс, роден на 2 јуни 1941 година во Лондон, го открил џезот кога имал десет години. Му се допаднале Џели Рол Мортон и Чарли Паркер. Како дете ги проучувал тапаните. Го претворил старото бенџо, прекриено со кожа, во мал тапан, пишува на официјалната страна од бендот.
Не се образувал музички, туку учел да свири набљудувајќи ги одличните џез тапанари по лондонските клубови. По завршување на студиите за уметност се вработил како графички дизајнер и свирел во разни џез групи пред во 1963 година да му се придружи на легендарниот рок состав.
Во текот на кариерата со „Стоунси“, Вотс бил активен во својата љубов кон џезот како лидер на џез квинтети и тентети и бендот „Чарли Вотс оркестар“ со 32 членови.
Не се плашел од распад на бендот
Како членовите на групата старееја, Вотс не се загрижувал околу евентуалниот распад на групата.
– Да кажам дека ова е последното шоу не би бил посебно тажен момент, барем не за мене. Само ќе продолжам како вчера или денес – изјавил во интервју за „Њу Мјузикал Експрес“ во 2018 година, кога како седумдесетгодишник се подготвувал за уште една турнеја со групата.
– Си одев на крајот од секоја турнеја. Ќе одработевме шест месеци во Америка и ќе им кажев: „Тоа тоа, јас си одам дома“.
Но, секогаш се враќал.
– Два дена подоцна дома стануваш нервозен и твојата сопруга ти вели: „Зошто не се вратиш на работа? Кошмар си“ – открил Вотс.
Списанието „Ролинг Стоун“ во 2016 година го прогласи за 12 најголем тапанар на сите времиња. Десет години претходно, списанието „Модерн драмер“ го избра во „Куќата на славните модерни тапанари“ заедно со други истакнати имеиња како што се Ринго Стар од „Битлси“ и Кит Мун од групата „Ху“.
Во 2004 година на Вотс му беше откриен рак на грлото, од кој целосно закрепна. Се повлече од одложената турнеја на „Стоунси“ која беше закажана за септември 2021, бидејќи закрепнуваше од медицински зафат.
– Еднаш мојот „тајминг“ не е добар. Работам напорно за да бидам во добра форма, но денес го прифатив советот на стручните лица дека тоа ќе потрае – изјави.
„Ролинг Стоунс“ последен пат свиреа на коцерт „Еден свет: Заедно дома“ во април 2020 година, кога го изведоа својот класик од 1969 – „You Can’t Always Get What You Want“.
Вотс се придружи од дома, свирејќи „воздушни“ тапани.