Во Белград постои нулта толеранција за сите кои организираат забави и ги прекршуваат епидемиолошките мерки, но нема да допуштиме, ниту да се сложиме со воведување на нулта толеранција за живот, доколку биде прифатен предлогот за воведување на „полициски час“, изјавуи денеска заменик градоначалникот на српската престолнина, Горан Весиќ.

Весиќ истакна дека минатиот викенд покажал оти при ограничување на работното време на угостителските објекти до 14 часот настанува „стампедо“ по рестораните, теретаните и трговските центри и дека поголем број на луѓе престојува во ист простор во краток временски период.

Тој додаде дека евентуална одлука за затворање би била погубна за малите фирми што во најголем дел се семејни и оти никој не размислува за последиците по менталното здравје на населението.

– Наместо да плашиме народ со „полициски час“, треба да се фокусираме на спроведување на постоечките епидемиолошки мерки и како да се чуваме и на тој начин да овозможиме на луѓето да работат, заклучи Весиќ со напомена дека се останато е против економијата и интересите на градот.