Собраниската комисија за политички систем во вторник ќе организира јавна расправа за законот за јавно обвинителство на која, покрај политичарите, поканети ќе бидат и државниот јавен обвинител Љубомир Јовески, домашни и странски експерти и меѓународни претставници. Лидерот на СДСМ Зоран Заев, денеска посочи дека повеќе нема време за чекање и дека законот мора да се изгласа најдоцна до 11 февруари, ден пред распуштањето на парламентот и распишувањето на предвремените парламентарни избори.

Од опозициската ВМРО-ДПМНЕ најавија дека ќе учествуваат на јавната расправа, но поддршка ќе дадат само доколку има интерес за промени на членот 64 кој се однесува на изборот и разрешувањето на државниот обвинител како и преодните и завршни одредби. Лидерот на партијата Христијан Мицкоски изјави дека тие, ниту го прифаќаат, ниту пак го отфрлаат предложеното законско решение.