Русија го задржува правото да преземе реципрочни мерки по протерувањето на двајца руски дипломати од Бугарија, изјави портпаролката на руското Министерство за надворешни работи, Марија Захарова.

– Како што е предвидено со дипломатската пракса, Руската Федерација го задржува правото на реципрочни мерки. Уште еднаш, ја повикуваме официјална Софија да престане да учествува во лов на вештерки, што им штети на националните интереси на самата Бугарија. Време е да се вратиме на конструктивната билатерална агенда, далеку поприродна за руско-бугарските односи, додаде Захарова.

Таа нагласи дека антируската „шпионажа” се интензивирала во Бугарија во пресрет на парламентарните избори закажани за 4 април, како и во контекст на општото влошување на односите меѓу Русија и западните земји, особено со САД.