ГЕРБ не ја отстапила темата Северна Македонија на ВМРО-БНД за предизборни цели, изјави вицепремиерката и министерка за надворешни работи на Бугарија Екатерина Захариева во интервју за електронското издание на Клуб З, јави дописникот на МИА од Софија.

-Секој договор мора да се спроведува со добра волја, да не спомнувам договор меѓу државите и да не се бараат причини за неисполнување – избори, КОВИД-19 итн. Ако барате начини и изговори, ќе ги најдете. Усогласеноста со договорите е апсолутно обврзувачки принцип во меѓународното право, вели Захариева.

Факт е, додава таа, дека секогаш може да се бара подобрување во кој било договор, но слушнала за тоа дека оние што го критикуваат велат дека постојат контролни механизми, вклучително и мониторинг.

-Во нашиот случај, тоа е Меѓувладина комисија, која мора да се состанува секоја година и да прави проценки за спроведувањето и да ги постави идните цели за следната година. Исто така, има јасни одредби во Договорот за историската комисија – се вели колку често се состанува и врз основа на што работи. Да речеме дека постоеше период од една година за работа на историската комисија – што ако една земја одлучи еднострано да ја прекине својата работа порано, што треба да сториме? Вие разбирате дека нашите членови, кои се многу почитувани научници, избалансирани експерти, не можат да ги обврзат другите колеги да присуствуваат на состаноците, вели Захариева.

Таа посочува дека истотото важи и за Коридорот 8.

-Истото важи и за Коридорот 8, ние постојано инсистираме на забрзување на работата на проектот. И не само ние, јас присуствував на состаноци каде претходниот комесар за проширување на ЕУ повика на ова и предупреди дека тие не се подготвени за проект и дека ќе изгубат пари. Ние сме посветени на стимулирање на нашата деловна активност и од двете страни, и добиваме низа сигнали од бугарски компании, кои создаваат неоправдани административни бариери. Постои посветеност да се обидеме да спречиме говор на омраза, а во исто време, официјални лица на РСМ секојдневно зборуваат против Бугарија. Има што да се посака, ова е точно од некои аспекти за обете земји, рече министерката Екатерина Захариева.