Бугарската вицепремиерка и министерка за надворешни работи, Екатерина Захариева во интервју за „Ефе“ изјави дека Бугарија го блокира почетокот на пристапните преговори на Северна Македонија со Европската Унија се додека не го напушти говорот на омраза кон се што е бугарско, пренесува БГНЕС.

„Проблемот со историјата е во тоа што погрешните и лажни толкувања на настаните и луѓето имаат директно влијание врз актуелните случувања и тоа создава говор на омраза и негативна кампања против Бугарија и Бугарите, нешто што е апсолутно неприфатливо за нас“, објасни Захариева.

Вицепремиерката ја обвини македонската политичка елита дека ги потрошила 30-те години независност за да го стимулира тој говор на омраза, што на крајот се одразило врз обичните граѓани во земјата.

Бугарија никогаш не го негирала правото на постоење македонска држава, ниту нејзиниот суверенитет и желба да го нарекува јазикот како што сака, но сето тоа, нагласила Захариева, не треба да биде врз основа на лаги и негирања за начинот на кој е создадена нацијата.

„Република Северна Македонија има солидно искуство во непочитувањето на билатералните договори“, вели Захариева.

Според вицепремиерката, спроведувањето на договорот престанало откако земјата влегла во НАТО.