Заев: Со Бугарија треба да си простиме и да подадеме рака!
Изразувам жалење што моето интервју предизвика силни негативни емоции за кои сум свесен и ги разбирам, но имам обврска да ги поттикнам македонските граѓани за изнаоѓање решение, изјави премиерот Зоран Заев.
– Треба да се соочиме со прашањата од историјата и да најдеме капацитет за разбирање и простување, вели Заев, додавајќи дека европските држави ги оставиле историските конфликти во минатото.
Тој нагласи дека македонската државност се темели на антифашизмот, но дека на фашистичката идеологија не треба да и се припишуваат етнички карактеристики.
– Не е поглед кон иднината ако денеска зборувате за фашистичка Бугарија. Да си простиме и да подадеме рака, порача премиерот.
Според Заев, царска Бугарија во 41-вата година застанува на страна на фашистичкиот Троен пакт, но додаде дека никој не ги прашал Бугарите на референдум за став и не треба сите Бугари да се квалификуваат како фашисти. Тој дополни дека била создадена и т.н. „железна завеса“ меѓу Југославија и Бугарија која се чувствува и денеска.
Заев потсети дека македонскиот идентитет и јазик не се тема на преговори и повика Бугарија да ја признае оваа, како што вели, македонска реалност.
Одговарајќи на новинарско прашање, тој потенцира дека не знае дали интервјуто ќе помогне за зелено светло за преговарачката рамка од страна на Софија, но дека негова задача било да презентира друг поглед на нештата.
– Свесен сум за реакциите после интервјуто, но лидерите треба да одат напред и да го направат првиот чекор, заклучи премиерот Заев.