Заев – Радев: Наша обврска е да го градиме пријателството меѓу нашите братски народи

Зоран Заев и Румен Радев / Фото: Архива на „Слободен печат“

Јасната европска перспектива на Северна Македонија е од големо значење за Бугарија и нејзиното конкретно остварување е во прилог на заедничката иднина на двете земји во ЕУ. Ова, како што соопшти владината прес-служба, било истакнато на средбата на премиерот Зоран Заев со бугарскиот претседател Румен Радев во Софија. На средбата присустуваа и вицепремиерот за европски прашања Никола Димитров и министерот за надворешни работи Бујар Османи.

На средбата беше истакнато дека посетата на делегацијата на Владата на Северна Македонија на Бугарија на највисоко ниво, е од исклучителна важност и доаѓа во момент кога силната динамика на контактите и дијалогот е од огромна важност за односите меѓу двете земји.

Премиерот Заев на средбата истакна дека градењето на пријателството меѓу братските народи на двете земји е обврска на лидерите кои пред себе треба да ја имаат перспективата на младите.

Самата денешна посета на владината делегација на Северна Македонија во Софија може да се смета како значаен исчекор кој ќе ги поттикне идните чекори за решенија за отворените прашања на кои двете страни ќе посветат сериозно внимание, се наведува во соопштението.

Како што јави дописникот на МИА од Софија, Кабиентот на Радев информира дека во фокусот на разговорите на средбата било продлабочувањето на билатералниот дијалог и изгледите за реален напредок во процесот на европска интеграција на Република Северна Македонија.

Радев истакнал дека за Бугарија, Република Северна Македонија е најважната блиска пријателска земја.

– Затоа ни требаат редовни контакти, дијалог и соработка. За жал, во последниве години овие односи стигнаа до ќорсокак, дијалогот е замрзнат и тоа влијаеше на вашите изгледи за влез во ЕУ, нагласил Радев.

Според него, Договорот за соработка во 2017 година нема специфични обврзувачки услови и рокови, а тоа овозможило „варијабилни одлуки и активности”.

Румен Радев на средбата упатил и благодарост на претседателот Стево Пендаровски за заедничката посета на Рим.

– Нашата заедничка посета на Рим ја демонстрира нашата заедничка волја и претставува сигнал до сите наши граѓани за соработка, пријателство и разбирање, потенцира Радев.

Според Радев, властите во Софија и во Скопје се должни да им обезбедат заедничка европска иднина на своите народи.

– За нас е многу важно да имаме дијалог и ви честитам на фактот што сте тука за отворен, конструктивен дијалог, додаде Радев, најавувајќи дека Бугарија ќе донира 50.000 вакцини за Северна Македонија.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот