Премиерот Зоран Заев утре ќе отпатува за Брисел, во последен обид да излобира датум за почеток на преговори со Европската Унија. Заев најави дека ќе ги искористи сите средби со премиерите за да ги убеди во носењето на одлуката. Тој верува дека конечниот став ќе го даде Европскиот совет.

–  Денеска заминувам за Австрија, заедно со вицепремиерот Кочо Анѓушев, имам состаноци со стопанствениците. Од Австрија заминувам за Брисел. На 17 октомври наутро или пред Европскиот совет состанок имаат Европската народна партија (ЕПП), исто и Партијата на европските социјалисти (ПЕС). Тука се сите премиери, ќе ја искористиме можноста да разговараме со сите премиери, тоа е последно пред одлуката, за на крајот навистина да ја утврдиме таа одлука – вели Заев.

Премиерот во изјавата на иста линија со претседателот на државата Стево Пендаровски.

-Не постои земја, барем според нашите анализи во последните 20 години, која чекала и добила ваква одлука за почеток на преговорите, а направила повеќе од нас. Направивме повеќе за реформите, направивме повеќе на меѓународен план, билатерален план, од секој можен аспект навистина сме пример и за Европа и за светот – вели Заев.