Не сум се слушнал со Катица Јанева, не е точно дека ме барала мене, рече премиерот Зоран Заев на прашање дали се точни шпекулациите дека пред да и биде одземен телефонот, Јанева телефонирала на висок владин функционер.

– Ако нешто се случило и некој со некого контактирал може да ги прашате Јанева, дипломатите и Јавното обвинителство кое рече дека го земале телефонот за да видат дали постои доказ за конекција, за да се види дали навистина има нешто или е само е злоупотребена. ЈО е должно да даде информации за тоа дали Јанева е употребена или злоупотребена согласно доказите – рече Заев.

Според него, етички, угледот може да се наруши и заради невниманието со кого дружиме.

– Јас бев насанкан од пранкери, лажни претседатели. За мене никој не е виновен додека тоа не се докаже, истрагата тоа ќе го докаже. Стојам зад институциите, нивното создавање не е лесна работа, особено такви за кои државата имаше насушна потреба. СЈО се создаде со консензус зошто ОЈО не функционираше. Додека не се докаже дека Јанева е инволвирана во криминал стојам зад неа – рече Заев.

Тој не кажа кои се фунционерите од СДСМ кои се инволвирани во случајот со Бојан Јовановски, ниту пак која е странската држава која помогнала во откривање на изнудата на бизнисмените, односно дали тоа  е Бугарија.

-Бугарија е наш голем пријател, од кај да знам дали таа е инволирана, нема да си дозволам такви шпекулации. ОЈО нека каже која е странската држава – рече премиерот.

Заев истакна дека во минатото многу вакви случаи биле заташкувани од извршната власт.

– Порано за своите се гинеше до крај. Денеска покажуваме дека никој не е заштитен, секој ќе одговара за тоа што го направил, ќе бидат отворени истраги. Тоа е голема разлика и на тоа сум горд. Вака правната држава никогаш не била присутна, борбата против криминалот и корупцијата е императив – потенцираше премиерот.