Поранешниот пратеник Сафет Бишевац вечерва во гостувањето на ТВ21, околу последните случувања со неуспешната иницијатива за уривање на Владата во Собранието рече дека Зоран Заев „има историја на купување на пратеници“.

„И понатаму тврдам дека тоа што не беше исполнет еден џентрлменски договор, ќе се види многу брзо зошто Реџепи го смени мислењето. Но, таков начин како што актуелното владеачко мнозинство ја обезбеди самоизолацијата на г-нот Реџепи, сѐ може да се случи. Знаеме дека Заев има историја на купување и обезбедување на пратеници, како што беше со промената на Уставот“, рече Бишевац.

Покрај него, во емисијата гостин е и поранешниот градоначалник на Карпош, Стефан Богоев, кој му реплицираше на Бишевац дека секој што ќе седне на иста маса со Апасиев, е „ретроградна сила“.

Богоев вели дека СДСМ има поголем потенцијал за коалицирање од ВМРО-ДПМНЕ и тоа се покажало во четвртокот. Тој е категоричен дека за брзо време соодносот во Собранието нема да биде 60:60.

-Подаваме рака на целиот демократски совет и на сите пратеници. Пратениците и политичките партии со исто вредности како нашите се многу повеќе во државата, отколку оние кои сакаат државата да стои во место. Секое лошо за добро е. Ќе излезе поголема и постабилна од ова. Во моментов преговараме и со Алтернатива и за брзо ќе се знае се, рече Богоев.