Заев ги повика Македонците во Албанија: Гласајте за Еди Рама и Васил Стерјовски на изборите на 25 април
Премиерот Зоран Заев преку видеопорака ги повика Македонците во Република Албанија да гласаат за Еди Рама и за македонскиот кандидат Васил Стерјовски на парламентарните избори на 25 април.
– Република Албанија на 25 април ќе одржи парламентарни избори, а еден од кандидатите на листата на Социјалистичката партија на мојот драг пријател Еди Рама е и Васил Стерјовски, Македонец. Васил во изминатите две години беше дел од Парламентот во Албанија и е вистински репрезент на интересите на Македонците коишто живеат во Албанија.
Историски беше денот кога Васил Стерјовски стана првиот македонски пратеник во албанскиот парламент. Важен ден е и 25 април, денот кога вашиот глас, како Македонци во Република Албанија, ќе го дадете за Васил, за да продолжи со својата мисија да ги претставува Македонците во парламентот на Република Албанија, рече меѓудругото Заев.