Заев: Гасификацијата се одвива со добро темпо

фото: МИА

Северна Македонија е на европскиот енергетски колосек, а развојот на енергетиката е цврста гаранција за одржлив економски раст на долг рок, порача премиерот Зоран Заев на официјалното отворање на Македонскиот енергетски форум 2019, што годинава се одржува под мотото „Енергетска транзиција преку обновливи извори и енергетска ефикасност”.

Тој посочи дека земјава ја започна енергетската транзиција со носењето на новиот Закон за енергетика. Истакна дека диверзитетот во снабдувањето со енергија е клучен за развојот на државата.

-Ефикасната транзиција на земјата кон конкурентна економија ќе ја забрзаме со реализација на диверзификацијата во снабдувањето со зголемувањето на конкуренцијата на енергетските пазари и со зголемувањето на искористувањето на обновливите извори на енергија. Во таа насока од особено значење е обезбедувањето сигурност  и континуитет во снабдувањето со енергија на домаќинствата и компаниите, намалување на емисиите на стакленичките гасови и подобрување на општата состојба на животната средина, рече Заев.

Нагласи дека изградбата на гасоводите и гасоводните системи се одвива со добро темпо и додаде дека дел од општините веќе имаат подготвено документација за изградба на дистрибутивните системи на природен гас, а во финална фаза влегува и процесот на изградба на интерконективно поврзување со гасоводниот систем на Република Грција.

-Со тоа добиваме уште една можност за снабдување со природен гас од Азербејџан и истовремено и можност за поврзување со ЛНГ, посочи Заев.

Вршителот на должност абмасадор на САД во Република Северна Македонија, Микаела Швајцер Блум посочи дека САД и досега го поддржувале, а и понатаму ќе продолжат со поддршката на развојот на енергетскиот сектор во Северна Македонија.

-Американската енергетска технологија е вклопена во некои од најважните енергетски инфраструктури во регионот и пошироко во Европа.Таков пример е и соработката со Грција за увоз на американски  ЛНГ гас односно течен природен гас и во оваа насока ја поздравуваме вашата соработка со Грција и изградбата на интерконектор за природен гас, рече Швајцер Блум.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот