Премиерот Зоран Заев, денеска во одговор на новинарско прашање поврзано со покачувањето на минималната плата, изјави дека е „големо зло“ доколку работодавците им ја исплатат минималната плата од 14.500 на граѓаните, а потоа бараат одреден дел од тие пари назад.

– Ако државата, синдикатот, коморите, стиснале заби и направиле сериозен чекор поврзан со минималната плата, во амбиент кога државата ги супституира придонесите за секое покачување на платата, вклучително и минималната плата, сакам да знаат сите, дека оваа незаконост која ја спомнавте како можност е казнлива одма и веднаш. Не само што е незаконитост тоа е и зло – изјави Заев на денешната промоција на веб платформата „Отворени финансии“, одговарајќи на новинарско прашање.

– Зборуваме за плата од 14.500, сметките на четиричлено смејество месечно излегуваат 10.000 денари. Законите за ова кривично дело предвидуваат затвор. Ова е регулирано во кривичниот законик. Ова е должност и на трудовиот инспекторат, но и на финансиска полиција, управа за јавни приходи, а и мојот кабинет стои на располагање – рече Заев.

Тој рече дека покачувањето на минималната плата е ситуација во која сите победуваат, па така навистина не би било фер исплатените пари потоа да се бараат од работникот.

– Со минималната плата државата помага во придонесите. Ова е вин-вин ситуација за сите. И за работниците и за работодавците и за државата. Да го направиме чекорот, чесно искрено и законски, бидејќи казната за ова е затвор. Не се заканувам на никого, но барањето на парите од работниците по дадена плата е големо зло- заклучи премиерот.