Еден ден од викендот е секогаш резервиран за похувано бело месо и компири, било печени или пире. Ако сакате малку да ги промените работите и месото да го направите на поинаков начин, тогаш пробајте похувани пилешко коцки полнети со путер. Ароматични, сочни и вкусни, ќе ве воодушеват уште на првиот залак.

Слободно исфрлете ги јајцата од смесата за похување, бидејќи пивото измешано со брашно исто толку добро ја врзува смесата и го прави месото нежно и сочно.

Состојки:

– 500 г бело месо
– 150 г путер
– 150 г сирење чедар
– 20 г мирудија
– 200 г брашно
– 250 мл пиво
– 150 г презла

Подготовка:

Месото исечете го на тенки шницли и исчукајте го, а потоа секое парче посолете го и зачинете го. Путерот на собна температура измешајте го со рендано сирење чедар и сечкана мирудија. Добро измешајте, па ставете го на проѕирна фолија и со прстите малку распоредете го и обликувајте го во квадрат. Уште еднаш превиткајте го со проѕирна фолија, па затворете го, а потоа развлечете го со сукало за да добиете подебел квадрат. Ставете во замрзнувач половина час. Исечете на коцки и ставете во средината на секоја шницла. Преклопете прво по должина, а потоа и по ширина, за месото да се покрие со цела коцка путер. Завиткајте во проѕирна фолија и наредете во тесен сад и вратете во замрзнувач половина час. Брашното и пивото измешајте ги и добро соединете, па секоја коцка месо (задолжително отстранете ја проѕирната фолија) валкајте ја прво во смесата, па во презлата. Пржете во загреано масло.