Забавената инфлација во САД ја намали побарувачката на злато
Цените на златото денеска паднаа на азиските берзи како резултат на процената на инвеститорите за влијанието што може да го има намалувањето на инфлацијата во САД врз идните одлуки за монетарна политика на Федералниот резервен систем на САД, пренесе „Политика“.
Златото вчера скокна, откако беше објавено дека американскиот индекс на потрошувачки цени забави повеќе од очекуваното во јули, што укажува на тоа дека од Федералниот резервен систем може да бидат помалку агресивни со зголемување на каматните стапки.
Вчера цената на овој благороден метал најпрвин порасна за 0,8 отсто на 1 807,93 долари, што е највисоко ниво од 5 јули, по што цената почна да се намалува и заврши со пад од 0,1 отсто.
Златото го продолжи својот надолен тренд и денеска на берзата во Сингапур, каде што при утринското тргување цената падна за 0,3 отсто на 1 786,26 долари за унца, пренесува „Блумберг“.
Некои трговци ги намалија своите проценки за зголемување на основната каматна стапка на Федералниот резервен систем и сега предвидуваат зголемување на стапката за половина процентен поен како најверојатен исход од состанокот на американската централна банка следниот месец, додека претходно се очекуваше дека зголемувањето ќе биде 0,75 отсто.