За подолг живот, пешачете шест километри дневно

Спроведено е истражување што покажало дека поради пандемијата со ковид-19, дошло до огромен пад на активноста на луѓето. По само 30 дена телесна неактивност доаѓа до значајно слабеење на функцијата на срцето и на крвните садови, се нарушува метаболизмот на гликозата, се намалува густината на коските и количината на мускулите, истакнуваат лекарите.

Според истражувачите, постои стручен консензус дека минималната количина на движење во денот е околу 5.000 чекори, а 10.000 чекори се сметаат за оптимална количина на движење. Со други зборови, 5.000 чекори за преживување, 10.000 чекори за квалитетен живот.

Американски научници велат – направете 8.000 чекори на ден и ќе ви се зголемат шансите за подолг живот. Јапонските научници препорачуваат 10.000 чекори.

Студија објавена во списанието ЈАМА утврдила дека луѓето кои дневно ќе пропешачат 8.000 чекори (приближно 6,5 километри) имаат 51 осто помала веројатност да умрат во следните десет години од какви било причини, вклучувајќи рак и срцеви заболувања, отколку оние кои пешачат двапати помалку.

Ако пешачите уште повеќе, 12.000 чекори, веројатноста за смрт во наведениот период ќе биде 65 отсто помала отколку кај луѓето што ќе направат 4.000 чекори, наведува „Вашингтон пост“.

Научниците дошле до овие резултати со анализа на податоците од репрезентативен примерок од 4.840 Американци постари од 40 години, кои ги следеле десет години и ги броеле чекорите со акцелерометар, апарат што го носеле на страничниот дел од телото. Во десетгодишниот период починале 1.165 учесници во истражувањето.

Се покажало дека без оглед на возраста, полот или расата, повеќе чекори значеле и помал ризик од смрт. Притоа, интензитетот на одењето не бил важен.

Во текстот се напоменува дека, со оглед на моменталната состојба со коронавирусот, можете да чекорите и дома, во место. А и надвор, под услов да одржувате растојание од два метра од другите.

Еве неколку препораки за да почнете со позитивното адаптирање:

– Обидете се секои 30-60 минути седење да ги прекинете со куси станувања и истегнувања.

– Засакајте ги скалите: 10 ката дневно за почетници, а 20 и повеќе катови за напредни.

– Во случај на долго седење или лежење, направете неколку вежби за мобилност и активирање на мускулите што ве држат исправени.

– Секој ден со вежбање придвижете ја фреквенцијата на срцето, начинот и траењето приспособете ги на моменталната телесна форма.

– Вклучете вежби за дишење.

– Водете сметка за балансирана исхрана, внесувајте течности и имајте квалитетен сон.

За да знаете дали сте направиле доволно чекори, проверете ги наведените податоци подолу во кои ви го донесуваме просечниот број чекори што ги правите додека одите, пешачите и ги извршувате домашните работи.

1. ПО МИНУТИ

1 минута = 118 чекори

10 минути = 1.180 чекори

30 минути = 3.540 чекори

60 минути = 7.080 чекори

2. ПО КИЛОМЕТРИ

1,6 километри = 2.000 чекори

4,8 километри = 6.000 чекори

6 километри = 8.000 чекори

8 километри = 10.000 чекори

12,9 километри = 16.000 чекори

 

Видео на денот