Министерката за економија на Црна Гора, Драгица Секулиќ, најави дека во рамките на меѓународните организации и иницијативи, нејзината земја веќе исполнила голем дел од она што содржи најновата иницијатива на лидерите на Македонија, Србија и Албанија и дека нема никакви трговски и други бариери кон другите држави, пренесе српска „Политика“.

Министерката изјави дека ја разбира потребата на оние земји кои меѓусебно си поставувале бариери да излезат со нова иницијатива.

– Факт е дека ние првпат се сретнавме со текстот, како што тие го нарекоа, „акциски план за забрзување на слободниот проток на стока, луѓе, услуги и капитал“, во Охрид на состанокот. Во тој документ нема ништо ново што ние досега веќе не сме го имале во различни декларации и договори. Црна Гора како членка на ЦЕФТА нема отворени прашања со ниту една земја во регионот, особено не со земјите кои се иницијатори на оваа иницијатива, што не е случај со нив меѓусебно. Така да потполно е јасно дека Црна Гора веќе ги отвори своите граници – рече Секулиќ.

Секулиќ рече дека Црна Гора ги исполнила сите препораки на Берлинската иницијатива, дека граѓаните веќе патуваат со лична карта во сите држави во регионот освен во Хрватска.

– Нема тука нешто ново што ние веќе го немаме направено. Јас денес се консултирав со колегите и прашав како изгледа проверката на тој акциски план. Тие ми напишаа дека сите мерки се реализирани – рече Сеулиќ, а пренесе Бета.

Таа додаде дека евентуалното приклучување на оваа иницијатива би претставувало само трошење на енергија на нешто што веќе Црна Гора го направила.