Новото драстично намалување на испораките на гас од страна на Газпром е „дополнителен доказ дека Европа треба да ја ограничи својата зависност од руските испораки колку што е можно повеќе”, рече чешкиот министер за индустрија и трговија Јозеф Сикела, чија земја претседава денеска на Советот на ЕУ, јави ДПА.

„Обединувањето и солидарноста се најдоброто оружје што го имаме против рускиот претседател Владимир Путин и сигурен сум дека токму тоа ќе го демонстрираме денеска”, најави Сикела пред претстојниот состанок на министрите за енергетика од земјите-членки во Брисел, на кој ќе одлучуваат за план за ограничување на употребата на природен гас во ЕУ.

Чешкиот министер додаде дека рускиот претседател Владимир Путин стои зад планот на државниот Газпром да ја намали испораката на гас во Европа.

„Путин ќе продолжи да ги игра своите валкани игри во злоупотреба и уценување на снабдувањето со гас”, рече Сикела.

Во февруари Русија ја нападна соседна Украина.

Руски Гаспром соопшти дека од среда ја намалува дневната испорака на гас за Европа преку гасоводот Северен поток на 33 милиони кубни метри дневно – околу 20 отсто од капацитетот на гасоводот.