Освен членот 130 од Кривичниот законик постојат и во законикот се предвидени други 422 члена, од кој особено важни за познавањето на материјата се потребни првите 122 члена. Условите за одмерување на казната се предвидени токму во тие членови кој што очигледно Оливер Андонов или ги прескокнал или не ги знае. Ова за „Слободен печат“ го вели адвокатот Мирослав Вујиќ, бранител на Курто Дудуш, градоначалникот на општина Шуто Оризари чиј што клиент денеска од Кривичниот „заработи“ судска опомена. Токму за оваа пресуда, професорот Оливер Андонов од Воената академија, кој воедно не е правник, во изјава за порталот Курир тврди дека пресудата била „патолошки општествен феномен наречен владеење на СДС во Македонија“.

– Во сфера на патологија е коментирањето за судски одлуки од луѓе кој што не влегле во судница, кој што не знаат ни каде да седнат во судница, а уште помалку да толкуваат судска пракса. Политиката во овие предмети не се меша, ниту се мешала, особени во последните 2,5 години, а патолошки општествен феномен треба да се гледа низ призма на еднодневни излети на професори на министерски фотељи, а не во судската пракса или во владеењето на некоја политичка струкура – вели адвокатот Вујиќ.

Тој додава дека ниту прв пат, ниту последен ќе биде да се донесе ваква пресуда, особено не во состојба кога странките искажуваат добра воља за смирување и отворено си даваат меѓусебна поддршка, како што беше искажано и од страна на тужителот после главната расправа и објавувањето на пресудата.