Вучиќ: Српската историја и географија ќе ја пишува само државата Србија
Српскиот претседател Александар Вучиќ најави дека на почетокот на следната недела ќе поднесе иницијатива само државата да може да ги составува учебниците по српски јазик, историја и географија.
-Српската историја и географија ќе ја пишува само државата Србија, изјави Вучиќ, пренесуваат медиумите.
Вучиќ, меѓу другото, потсети дека за време на претходната власт во Србија 90 земји од светот го признаа Косово.
„За време на нивната власт 90 земји ја признаа независноста на Косово, само молчеа на тоа. Нема да молчам и ќе го бранам Косово и Метохија како знам и умеам“.
Вучиќ истакна дека не постои никаков „нон-пејпер“ со барања околу Косово, но она што постои и што го очекува се „тешки притисоци“ и обединување на силите на Вашингтон и Брисел.
„Меѓусебното признавање стана мото“, кажа Вучиќ.
Српскиот престедател посочи дека знае „дека поради оваа иницијатива ќе има напади од тајкуни и некои амбасадори, кои ќе тврдат дека ја нарушува слободата на пазарот“.
По што им порача на истите дека може да се жалат во ОН, ЕУ, но дека тоа нема да се промени.
Истакна дека сè уште размислува за содржината на честитката која ја добил за Денот на државноста на Србија од американскиот претседател Џо Бајден.
„Чудно е тоа кога некој друг се радува, а не тој што ја примил честитката“, кажа Вучиќ, и додаде дека тоа не е пристојно, но дека тоа ќе му го каже на Бајден во лице.
Додаде дека Бајден не треба да се потценува бидејќи тој, е многу интелигентен човек.
„Станува збор за сериозен и искусен политички лидер. Постојат нешта кои се факти, но ако сакаш да испратиш некоја политичка порака го земаш телефонот и се јавуваш“, кажа Вучиќ.